Egile-eskubideei buruzko ohiko galderak

Egile-eskubideak egilearen bizitza osoan eta egilea hil eta beste 70 urtez (hurrengo urteko urtarrilaren 1etik) daude indarrean.

Lankidetzan egindako obren babes-epeak hiltzen den azken egilea hiltzen den urtearen amaieratik aurrera kalkulatzen dira. Adibidez, zinema-obra baten babes-epearen epemuga kalkulatzeko, hil den azken zuzendari nagusi, gidoilari edo filmerako sortutako elkarrizketen idazle edo musikaren konpositorea hil zen urtea hartuko da kontuan.

Erabilera pribaturako, obren kopiak egin daitezke, baldin eta pertsona fisiko batek egiten baditu eta hirugarrenen laguntzarik gabe.

Ikastetxe batean irakaskuntza-erabilerarako kopiak egitea ez da erabilera pribatua, legeak aurreikusitakoaren arabera; beraz, baimena behar da horretarako.

Obra bat kopiatu eta Internetera igotzea ez da erabilera pribatua, eta baimena behar da, adibidez, norberaren webgune batean beste norbaitek egindako argazki bat edo marrazki bat jartzeko.

Une honetan jendarteratzen da obra bat: egilearen adostasunarekin jendearen eskura jartzen den lehen aldian; adibidez, egileak bere blogean eskuragarri jartzen duenean, Interneten partekatzen duenean, irakurketa publikoa egiten duenean, koadro bat galeria edo museo batean erakusten denean eta abarretan.

Egileak eskubide morala du erabakitzeko nola jendarteratzen den bere obra. Obra bat kasu honetan argitaratzen da: beharrak behar bezala asetzen dituen ale-kopuru bat (obraren izaera eta helburuaren arabera zenbatetsita) jartzen denean publikoaren eskura. Adibidez, liburu bat liburu-denda batean salgai jartzen denean argitaratu da. Norbaitek egile baten obra bat argitaratu nahi badu, haren adostasuna behar du.

Egile-eskubideek ez dute babesten obra baten informazioaren, ideien edo iritzien edukia. Norberaren testu bat idazteko edo beste obra bat sortzeko aprobetxa daitezke.

Obra bat aldatzea, oro har, baimena behar duen eraldaketa-egintza bat da.

Obra baten kopiak baimenik gabe egitea eta kopiak banatzea jabetza intelektualeko eskubideak urratzea da.

© marka nazioarteko sinbolo bat da: egile-eskubideek babesten duten obra batean egilearen edo egile-eskubideen titularraren izenaren aurrean erabiltzen da. Copyright sinboloa erabiliz, obra baten egile-eskubideen jabea nor den adieraz daiteke. Hala ere, ez da eskatzen © sinboloa erabiltzea egile-eskubideak izateko edo babesa jasotzeko. Copyright edo © sinbolorik ez egoteak ere ez du kentzen obra-mailara iristen den lan bati dagozkion egile-eskubideen babesa. Obra bat sortzean sortzen dira egile-eskubideak; une horretan hasten da babesa, eta horretarako ez da behar, ez erregistrorik, ez bestelako izapiderik.

Ez dago ezarrita © sinboloa erabiltzeko modu berezirik. Honela erabiltzea da ohikoena: Copyright ©, autorearen edo eskubideen titularraren izena eta lehenengoz argitaratu den urtea. Halaber, copyright hitza jarri gabe utz daiteke. Adibidez, © CEDRO 2020.

Eskubideen titularrak bere obraren erabilera baimentzeko aukeratu ditzakeen lizentzia-aukeretako bat da Creative Commons. CC lizentziak obra nola erabil daitekeen adierazten duten ikono gisa agertuko dira webgunean. Webgune honetan duzu CC lizentziari buruzko informazio gehiago creativecommons.com.